Slik feira Bergsøy jonsok

Aksla prøvde å spolere jonsokstemninga, men Bergsøy hadde kontroll og kunne til slutt juble for ein solid 4–0-siger på jonsokaftan. No rettar herøyværingane blikket mot neste oppgåve: toppkampen borte mot Herd.

Bergsøy fekk akkurat den starten dei trong mot eit Aksla-lag som låg lågt og gjorde seg vanskelege. Etter 12 minutt sat leiingsmålet: Daniel Jøsok Kvalsvik steig til vêrs og nikka inn ein corner frå Bendik Frøysa – 1–0.

Og heimelaget heldt fram å vere effektive. Elleve minutt seinare kom 2–0, då Nils-Erik Engen fekk godt med rom i Aksla-forsvaret og kunne setje inn ei komfortabel dobling.

Bergsøy kunne ha auka ytterlegare før pause. Frøysa var nære då han stupheada i tverrleggjaren, men fleire scoringar kom ikkje i første omgang på Havila stadion Fosnavåg.

Søvndyssande – heilt til Muren punkterte

Etter kvilen gjekk kampen inn i ein periode som i lange strekk vart relativt søvndyssande. Ingen av laga spelte seg til store sjansar, og det såg ei stund ut til å bli ein kamp som berre skulle “spelast ferdig”.

Men så, etter 78 minutt, losna det. Fredrik Muren kom seg fri inne i feltet og fekk avslutta frå om lag fem meters hald. Då sat 3–0, og kampen var i praksis punktert.

Høgdepunktet kom likevel først seks minutt seinare. I det 84. minuttet stilte banens beste, Nils-Erik Engen, seg opp på frispark frå rundt 20 meter. Eit lite sekund etter var ballen klistra i nettet, og Bergsøy kunne juble for 4–0 og ein perfekt jonsokavslutning.

– Eg har prøvd meg på frispark lenge no, men det har ikkje blitt mål sidan tidleg i førre sesong. Så det var på tide, seier Engen.

Tidleg hol på byllen

Med røyklukt i lufta og eit heller lågt tilskodartal (192), var det mykje som kunne tyde på at den store jonsokfeiringa føregjekk ein annan stad enn på stadion. Aksla var heller ikkje interesserte i å bidra til nokon fotballfest, og med eit kompakt forsvar kunne dette fort ha blitt ein småtung kveld der Bergsøy trilla mykje utan å kome seg gjennom.

Slik vart det også i periodar – men Bergsøy fekk, som Engen peikar på, det viktige målet tidleg.

– Kampen vart som forventa. Dei ligg lågt. Heldigvis fekk vi mål tidleg, slik at vi fekk meir rom til å trille ball, seier Engen.