Roger Kvalsvik

Roger Kvalsvik kan med rette kallast ei Bergsøy-ildsjel. Engasjementet hans i klubben strekkjer seg over meir enn eit halvt hundreår – som utøvar, trenar, leiar, organisator og motivator.

Han har vore aktiv innan både fotball, friidrett og trim, og i 2020 blei han utnemnd til æresmedlem i Bergsøy Idrettslag.

«Engasjementet denne personen har hatt for Bergsøy strekker seg truleg over 50 år. Han var i sin ungdom aktiv i Bergsøy både i fotball og friidrett. I studietida hevda han seg på svært godt nivå i mellomdistanse, og var med på å bygge opp friidretten i Bergsøy Idrettslag. Det er ei stor glede for Bergsøy Idrettslag å utnemne Roger Kvalsvik til nytt æresmedlem.»

– Torbjørn Hide under 75-årsfesten i 2020

Roger har sjølv vore inne på tanken om at han kanskje hadde for mange roller i klubben i enkelte periodar, og at det kunne gjere det vanskelegare for andre å ta over.

For oss seier det mest av alt noko om kor sterkt engasjementet hans var.

«Eg hadde treningar kvar torsdag i 22 år samanhengande. Så torsdagane åt eg ikkje middag. Då fór eg rett på trening frå jobb. Det var fast regel.»

Frå fotball til friidrett

Roger starta med fotball på gutte- og juniornivå før friidretten etter kvart tok over.

På denne tida hadde Bergsøy ikkje noko eige etablert friidrettsmiljø, og Roger sprang derfor for KFUM Volda, blant andre saman med Olaus Jon Kopperstad. Fleire herøyværingar representerte Volda i denne perioden.

I 1971 sprang Roger 2 kilometer på 7.10 i klassa 15–16 år. Same året vann han også klassa si i eit terrengløp i Hovdebygda.

På 400 meter hekk hadde han 66,1 sekund, og på 800 meter sprang han 2.13,8. Olaus Jon Kopperstad, som var to år eldre, sprang på 2.06,7.

Roger leverte også gode resultat på lengre distansar, mellom anna 8000 meter i Ålesundleikane.

«Eg budde vekke i ti år frå 1972 til 1982, og i den perioden starta dei nok å bygge opp friidrettsgruppa, med Jan Olav Sandnes som eldsjela då. Han var motivatoren som fekk med seg mange i kommunen.»

Gode år på mellomdistanse

I 1973 sprang Roger 400 meter på 58,8 sekund under KM i Kongstenhallen.

Han var også med på å føre Askim IL til siger i terrengløp i Kulås i ei blaut og tung løype.

Som 18-åring sprang han 1000 meter på 2.45,6 i eit kretsstemne i Askim. Seinare same året sprang han 800 meter på 1.59,8 og 400 meter på 54 sekund.

På 1500 meter sprang han i september inn til 4.23 på Halden Stadion. Det blei ein suveren siger og eit nytt KM for Askim.

I 1974 sette Roger ny personleg rekord på 800 meter på Bislett med 1.56,7.

Indre Smaalenenes Avis omtalte han då som eit lovande namn:

«Årets nye namn er Askim-gutten Roger Kvalsvik.»

Ti år seinare var det framleis ingen i Askim som hadde vore i nærleiken av denne tida.

Roger sprang også 400 meter på 52,6 sekund, eit resultat som fleire år seinare framleis stod på lista over dei 25 beste resultata gjennom tidene i Indre Østfold.

Tilbake mot Bergsøy

I 1975 var Roger medlem i KFUM, men i 1976 representerte han og Olaus Jon Kopperstad Bergsøy då dei nesten sprang likt i mål på 1500 meter med tida rundt 4.11.

Planen var no å stille lag i Holmenkollstafetten året etter.

«Vi fekk opp eit bra lag – på kvinnesida spesielt. Vi hadde blant andre Liv Koppen, Kaia Hilde Husøy, Berit Kvalsvik og Anita Kvalsvik. Trur dei også sette kretsrekord på 4 x 400 meter.

Liv Koppen hevda seg spesielt på lengre distansar og Hilde på 400 meter og lengde i den perioden. Men der var mange som var med.

Vi som var litt eldre, eg og Olaus Jon Kopperstad, sprang stort sett for andre klubbar i den perioden. Men vi skrapa saman eit Holmenkollstafettlag i 1977. Det er 15 etappar og krev ganske mange løparar. Vi gjorde det ikkje så aller verst.»

Bygde opp friidrettsmiljøet

Roger og Olaus Jon representerte KFUM Oslo vidare ei tid før begge flytta heim i 1982.

Friidrettsgruppa låg då litt nede, og dei starta opp ei seniorgruppe i Bergsøy som trenarar.

Dei fekk i gang aktivitet, deltok i stafettar og bygde opp ei løpegruppe som igjen stilte i Holmenkollstafetten.

Det skjedde også mykje organisatorisk. Klubben starta med idrettsmerkeprøver for vaksne og fekk ein ny organisasjonsplan med eige økonomiutval, stemneutval, treningsutval, kurs- og utdanningsutval og merkeutval.

Fleire var med på oppbygginga. Jon Peter Frøystad var både trenar og aktiv, medan Per Pareliussen, Gunnar og Liv Ryan og Ola Goksøyr også kom sterkt med.

Etter kvart voks det fram eit godt miljø både på gutte- og jentesida.

«Talent er her i massevis. Ein må berre få tak i dei og engasjere dei. Og skal ein finne dei, så må ein skape eit miljø.»

Talent heilt opp i landstoppen

Sakte, men sikkert kom fleire gode utøvarar fram. Nokre nådde heilt opp mot landstoppen.

Spesielt Lydia Iren Waage utmerka seg. Ho vann stort sett alt ho stilte opp i i si årsklasse, blei med på landslagssamlingar og fekk også invitasjonar til samlingar i utlandet.

«Enkelte blei ganske gode. For eksempel hadde Bård Inge Bø 2,07 i høgde, og det var fleire gode resultat.

Vi stilte stafettlag rundt omkring, og den tida var det eit bra miljø. Mange foreldre var med.

Det var absolutt ikkje berre eg som var der, men eg vil seie at eg saman med Jon Peter, Per Pareliussen og Ola Goksøyr utgjorde kanskje kjernen av trenarar i mange år. Kanskje oss fire som var mest og delte treningane mellom oss.»

Roger var også hovudtrenar for Lydia Iren Waage då ho oppnådde resultat som gjorde henne best i landet i si årsklasse.

Vestlandsnytt kunne på denne tida slå fast:

«Bergsøy er landets beste klubb.»

– Om mellomdistanse for jenter 13 år

Holmenkollstafetten

I 1984 var Bergsøy igjen ein stor gjeng som tok turen til Holmenkollstafetten, sjølv om konfirmasjon gjorde at enkelte måtte melde forfall.

På laget var Oddvar Kvalsvik, Kjetil Nørvåg, Roger Kvalsvik, Helge Kvalsund, Olav Torvik, Anton Elvesæter, Jan Magne Berge, Ingve Forus, Per Storøy, Jack Louis Bostad, Nils Svenning Sævik, Bjørn Myklebust, Tor Berge, Øistein Øgaarden, Olaus Jon Kopperstad, Gunnar Davanger og Leif Lillebø.

Myklebustvatnet rundt

I 1987 kom Roger først i mål under Myklebustvatnet rundt med tida 16.27 i den fem kilometer lange løypa.

Han vann klassa si også året etter.

I 1989 mottok både Roger og Ola Goksøyr femårsmedaljen for løpet.

Trenar – og nesten landslagsmann

I 1992 gjekk det rykte om at Roger skulle vere klar for landslaget.

Det blei seinare presisert at det var som trenar, ikkje som utøvar.

Same året fekk Roger også æra av å ta skjegget til Per Pareliussen, som før eit stemne hadde lova at skjegget skulle ryke dersom minst halvparten av deltakarane sette personlege rekordar.

Leiar og primus motor

Frå 1999 og utover 2000-talet var Roger i fleire år leiar i friidrettsgruppa.

Han var også ein sentral drivkraft bak Bergsøyleikane, som utvikla seg til å bli eit av dei største friidrettsarrangementa i Møre og Romsdal.

Roger var primus motor i mykje av aktiviteten og var også aktiv i Bergsøy IL si trimgruppe.

Då eit treningstilbod for aktive menn blei etablert i Herøy kyrkje, fekk treningsgruppa det passande namnet «Amen».

Okeke til Fosnavåg

Bergsøyleikane og friidrettsmiljøet fekk også merksemd langt utanfor kommunen.

Eit eksempel kom då Aham Okeke, ein av landets raskaste menn, kom til Fosnavåg på treningssamling.

«Eg skal bu heime hos Roger Kvalsvik. Det gjorde eg sist eg var her også, og der likte eg meg godt.»

– Aham Okeke, 2004

Framleis konkurransemenneske

Roger heldt seg fysisk aktiv langt inn i vaksen alder.

I år 2000 svinga han seg opp med staven og vann ein stavhoppkonkurranse med 1,85 meter, i konkurranse med blant andre Kjartan Paulsen og Bjørn Myklebust.

Han leia også heile heatet framfor Paul Kurt Nerland då deltakarane sprang rundt bana og vidare ned i vollgrava i konkurransar arrangerte av Tindeklubben Grei.

I 2005 deltok Roger i sitt første banestemne sidan 1982, ifølgje Vestlandsnytt.

Bergsøy arrangerte KM for seniorar og veteranar, og Roger blei den fremste medaljesankaren. Han vann både spyd og 200 meter.

Talent handlar også om å halde ut

Roger har gjennom fleire tiår vore utøvar, trenar, leiar og motivator for langt meir enn det som kan summerast opp i ei enkel liste.

Synet hans på talent seier mykje om korleis han sjølv har arbeidd med friidretten:

«Talent er todelt. Der er talent som openbert er talent og atletiske, men så er det eit anna talent – treningstalentet. Dei som faktisk held ut.

Friidrett krev mykje trening, og skal du bli god så må du trene mykje. Det held ikkje med fire gonger i veka.

Skal ein finne dei talenta, må ein skape eit miljø for å finne dei.»

Æresmedlem

I 2020 blei Roger Kvalsvik utnemnd til æresmedlem i Bergsøy Idrettslag.

Utmerkinga summerte opp eit engasjement som då hadde strekt seg over meir enn 50 år.

Frå ung mellomdistanseløpar med tider som stod seg i fleire tiår, via oppbygginga av friidrettsmiljøet i Bergsøy, Holmenkollstafetten, Bergsøyleikane, trenarjobben for nokre av klubbens største talent og ei lang rekkje leiaroppgåver:

Roger Kvalsvik har vore ein av dei viktigaste personane i Bergsøy-friidretten gjennom fleire generasjonar.