Tonny Pettersen spelte på midtbana og var både løpssterk og målfarleg. Med 215 registrerte kampar og 45 mål er han høgt oppe både på Bergsøy sin adelskalender og på målscorarlistene.

    Tonny seier sjølv at han ikkje hadde teknikken til den eldste broren Jack Pettersen, men han har til gjengjeld ein uslåeleg rekord: Han bomma aldri på eit straffespark for Bergsøy. Jack scora for øvrig 46 mål i si Bergsøy-karriere.

Informasjon

    Foreldra var Petter Pettersen (1927) og Anne Marie Stenersen (1931). Dei fekk sju barn, deriblant tre kjende spelarar på Bergsøy sitt A-lag: Jack Pettersen (1951), Tonny Pettersen (1962) og Kenneth Pettersen (1966).

    I 1978 spelte Tonny Pettersen 15 kampar for guttelaget under Gunnar Kjelstadli si leiing og tre kampar for juniorlaget under Kjartan Fagerlund. Juniorlaget blei krinsmeister dette året.

    I 1982 var Bergsøy tilbake på nivå tre i divisjonssystemet etter eitt år i den nest øvste divisjonen. Klubben hadde henta inn Vic Halom som trenar, og det var også fleire endringar i spelartroppen.

    Inn i stallen kom blant andre Trond Vike (19), Tonny Pettersen (20), Per Jan Brekke (19), Henning Moltubakk (24) og Paul Kurt Nerland, som var tilbake frå Spjelkavik.

   

    «Eit anna positivt trekk ved Bergsøy var Tonny Pettersen som leverte sin beste kamp til dags dato på seniorlaget. Han har sin styrke i pasningar som kan opne opp eit forsvar.»

    Vestlandsnytt etter kampen mot Hareid, juni 1982

    I 1983 var Tonny Pettersen og Marvin Arnesen uaktuelle grunna militærteneste, før Tonny melde overgang til Tjørvåg.

    I 1984 var han tilbake i Bergsøy under trenar Arne Klepp. Sesongen blei vanskeleg sportsleg og enda med nedrykk. I statistikken vår står Tonny med 12 kampar denne sesongen.

    Serieforma såg ut til å vere på veg opp før 1985-sesongen då Tonny ordna 1–0-siger mot Hareid i ein treningskamp. Dette skulle bli Tonny sin sesong, iallfall med tanke på målscoringa. Han scora 13 mål og blei lagets toppscorar.

    Blant anna tok han straffesparka, og han bomma aldri på eit straffespark for Bergsøy.

    Også i 1986 blei Tonny Pettersen toppscorar for A-laget. Denne sesongen enda han og Trond Paulsen med fem mål kvar.

    Tonny spelte på midtbana, og sjølv om han etter eigne ord aldri hadde teknikken til broren Jack, var konstruktivt midtbanespel med stikkpasningar og gode løp eit tydeleg kjenneteikn i kampreferata.

    I 1986 spelte Jack og Tonny saman på A-laget for første gong, medan Kenneth Pettersen kom på A-laget i 1987.

    I 1987 fekk Tonny sitt tredje gule kort for sesongen etter å ha sparka vekk ballen då dommaren hadde blåse i fløyta. Denne sesongen spelte han saman med Paulsen-brørne og Lars Ove Almestad på midtbana.

    Lars Ove og Tonny var ein løpssterk duo sentralt.

   

    «Banens beste var Tonny Pettersen som spelte ein stor kamp både på offensiven og ikkje minst på defensiven.»

    Vestlandsnytt etter kampen mot Brattvåg, juli 1988

    I 1991 spelte Tonny Pettersen på Moltu, der han kontrollerte midtbana saman med Henning Moltubakk.

    I april 1992 blei det meldt at Tonny hadde meldt overgang tilbake til moderklubben. Det blei litt déjà vu frå 1984, då han også kom tilbake til Bergsøy frå Tjørvåg før ein vanskeleg sesong som enda med nedrykk.

    1993 blei ein god sesong for Tonny, som styrte på midtbana. I mai var han kaptein for laget, og han vann mange duellar sentralt saman med Lars Ove Almestad.

    Før 1994-sesongen blei det meldt at Tonny hadde gitt seg, men han spelte ein kamp borte mot Ha/No. Også Fred Frantzen måtte då børste støvet av skorne for å spele sin siste kamp i karrieren.

    Det gav kanskje meirsmak, for Tonny var tilbake for fullt i 1995.

    I 1995 var han omskulert til back, der han hadde fine framspel og var villig til å gå på løp. Framleis sette han straffesparka i mål med 100 prosent utteljing.

    1995 blei ein suksess-sesong med berre to tap. Det eine kom heime mot Skodje, 0–1, der Tonny måtte forlate bana med raudt kort etter å ha stoppa ein motspelar som siste mann.

    Tonny spelte heile sesongen også i 1996, men nærma seg no slutten på karrieren. I 1997 spelte han for Bergsøy 2, men fekk også éin A-kamp borte mot Hareid.

    Det er den siste A-kampen vi har registrert Tonny i.

    I desember 1996 melde Vestlandsnytt at Tonny hadde spelt 214 kampar. Han fekk gullklokke for å ha passert 200 kampar.

    Mange år seinare var han framleis aktiv rundt Bergsøy. I 2007 var han lagleiar for Bergsøy sitt 1999-kull med Martin Pettersen som trenar, og i 2011 var duoen framleis med som leiarar for gjengen som då var blitt G12.

Statistikk

    I den gamle statistikken er enkelte mål oppførte som «12 + 1» i 1985 og «4 + 2» i 1989. Totalen i profilen er 45 mål.

Bilder