Skuffelsen var stor i Bergsøy-leiren etter kampen, og trenar Anders Helsem Hoff la ikkje skjul på at prestasjonen var langt unna det laget hadde håpa på.

– Vi er forferdeleg skuffa, naturlegvis, seier Hoff.

Bergsøy fekk aldri spelet til å sitje, og framover på bana vart det skapt svært lite. Då trenaren etter kampen fekk spørsmål om kva målsjansar laget hadde hatt, var svaret i praksis ingen.

– Det var ein slik dag der ingenting klaffa. Vi hadde for mange feilpasningar, dårlege touch og heldt generelt eit altfor lågt nivå. Vi møtte eit lag som kjempar for livet for å unngå nedrykk, og då må ein vere førebudd på kva som møter ein. Dette var rett og slett ikkje bra nok, seier Hoff.

Også situasjonen som avgjorde kampen passa godt inn i historia om ein kveld der lite gjekk Bergsøy sin veg. Franjo Tepuric såg ut til å ha kontroll på ballen, men i samspelet med keeper Pedro Luis Moreno Gonzalez oppstod det rot. Gonzalez, som elles har vore svært stabil, kom skeivt ut av situasjonen, og Valder fekk moglegheita dei trong til å setje inn kampens einaste mål.

Tapet svei ekstra fordi Bergsøy hadde ein gyllen sjanse til å blande seg endå sterkare inn i toppen. Før kampen visste laget at tre poeng kunne føre dei heilt opp i ryggen på Stordal dersom serieleiaren samtidig snubla mot Hødd 2.

I staden vart det ein kveld der Bergsøy sjølv gjekk på smellen.