Bergsøy stod imot i nær ein time, men måtte til slutt sjå seg slått 0–2 av Herd i toppkampen på Moa. Dermed går 4. divisjon inn i sommarpausen med fire poeng opp til førsteplassen for herøyværingane.

Bergsøy-trenar Lars-Petter Rønnestad var tydeleg på at Herd samla sett var det beste laget – særleg før pause.

– Eg synest generelt at Herd vinn fortent, for dei er betre enn oss i første omgang. Då har dei fleire store sjansar som dei brenn, eller som Pedro reddar. Vi er nøgde med 0–0 til pause, seier han til Vestlandsnytt.

Betre etter kvila – men Herd avgjorde

Etter pause var kampbiletet jamnare, og Rønnestad meiner Bergsøy løfta seg betydeleg.

– I andre omgang er vi mykje betre. Då er vi fullt på høgde, understrekar trenaren.

Likevel var det nettopp etter sidebyte Herd fekk utteljing. Etter 59 minutt kom 1–0 ved Mathias Maaseide Sæther.

– Målet kom etter eit innlegg der han fekk stå umarkert på bakre, forklarar Rønnestad.

Bergsøy fekk sjansen til å slå raskt tilbake, og trenaren peikar på fleire store moglegheiter – den største då Enrique Crespo Søvik heada utanfor frå fem meter. Også Lukas Sandanger kom til ei stor sjanse, men det ville seg ikkje.

Då klokka tikka mot full tid jaga Bergsøy utlikninga, og med det opna det seg rom bakover. To minutt før slutt punkterte Herd kampen på kontring ved Magnus Alexander von Løwensprung.

– Mot slutten gambla vi. Då stod vi nesten ikkje att med folk, så scora dei på ei kontring. Det kunne blitt eitt poeng i dag, men det er fortent at Herd vinn, seier Rønnestad.

– Relasjonane sit ikkje heilt

På spørsmål om kva som var mest og minst positivt, trekkjer trenaren fram innsatsen, men også at Bergsøy ikkje har fått jobba inn relasjonar godt nok – mykje på grunn av skadeproblem.

– Mest fornøgd er eg med at gutane står godt mot eit godt Herd-lag. I dag taper vi på at relasjonane våre ikkje sit heilt, fordi vi har hatt mykje skader. Vi blir litt upresise offensivt. Herd har gode relasjonar, og det er den største forskjellen på laga.

Inn mot kampen mangla Bergsøy to forsvarsspelarar som har spela nær sagt alt denne sesongen. Både Markus Kjelsli Ihle og Sondre Nygård Olsen var ute, og det stoppa ikkje der.

– I tillegg rauk Magnus (Myklebust) på oppvarminga. Vi merka godt at dei var ute, sjølv om dei som var med gjorde ein god jobb, seier Rønnestad, som forklarar at Bergsøy stilte med det han omtalar som ein ung benk.

Fire poeng opp – og tøff haust i vente

Samtidig som Bergsøy tapte, spela Ørsta 3–3 mot Rollon. Det gjorde at Herd passerte Ørsta på betre målforskjell. Begge står med 28 poeng, medan Bergsøy held fram på tredjeplass med 24.

– Sidan Ørsta avga poeng er vi no fire poeng bak Herd og Ørsta. Det blir vanskeleg å ta att, spesielt om Herd held fram med å vere så gode som dei var i dag. For oss handlar det om å vinne frykteleg mykje i haust, så har vi Herd i siste kampen. Men vi var ti poeng bak i fjor, det klarte vi å hente, minner Rønnestad om.

Seks vekers pause – og ein tung beskjed

No ventar sommarferie for 4. divisjonslaga. Bergsøy er tilbake i aksjon fredag 11. august, då Hovdebygda kjem til Havila stadion.

– Vi tek 14 dagar fri, så byrjar vi på oppkøyringa til haustsesongen, fortel Rønnestad.

Slik det ser ut no, ventar det kontinuitet i spelargruppa – men med eitt svært merkbart unntak: Stopparkjempe Trym Rekkedal flyttar til Bergen, opplyser trenaren.