Bergsøy fekk has på Ravn

Ravn er kjend som eit fysisk robust lag som ofte er vanskeleg å bryne seg på. Denne gongen klarte likevel Bergsøy å knekke motstanden.

Fredag kveld kom sesongens første siger, då Bergsøy vann 2–1 borte mot Ravn. Etter ein jamn og mållaus førsteomgang, skåra gjestane to mål etter pause, før heimelaget reduserte – eit mål som også vart det siste i kampen.

– Vi er svært nøgde med denne trepoengaren. Eg sa til spelarane etter kampen at dette var eit tydeleg steg fram frå i fjor. Det smakte godt, seier trenar Anders Helsem Hoff til Vestlandsnytt.

Ravn starta kampen best og var friske i opninga, men etter kvart jamna det seg ut. Laga gjekk til pause på 0–0 etter ein omgang utan dei heilt store sjansane. Om lag ti minutt før pause måtte Magnus Myklebust gi seg med lyskestrekk og vart erstatta av Franjo Tepuric.

Effektiv start på andre omgang

Etter pause tok Bergsøy gradvis over initiativet. Tomas Matuszczyk sende bortelaget i leiinga etter 49 minutt, og berre minuttet seinare auka Sander Mäkiperä Vike til 2–0.

Ravn svara då Nikolas Arne Fjørtoft reduserte etter 66 minutt, men Bergsøy heldt unna resten av kampen og sikra seg ein viktig bortesiger.

– Vi skåra to veldig fine mål. På baklengsmålet spelte bana oss eit lite puss – ballen stoppa opp i eit mjukt parti og lurte både forsvar og keeper. Totalt sett er vi godt fornøgde, og vi veit også at vi har fleire spelarar i bakhand som ikkje kunne vere med denne gongen, seier Hoff.

Muren utmerka seg

Trenaren trekkjer fram Fredrik Muren som Bergsøy sin beste spelar denne kvelden. Med leiarskap, energi og ein solid innsats gjennom heile kampen gjorde veteranen seg fortent til ros – i tillegg til at han stod bak ei målgjevande pasning.