Sterk heimerespons: Bergsøy avgjorde før pause og vann 3–0

Etter to tunge tap på rad var det tydeleg at Bergsøy kjende på behovet for å slå kraftig tilbake. Og framfor 226 tilskodarar fekk dei akkurat den starten dei trong mot SIF/Hessa: tre scoringar før pause, ein kamp som i stor grad vart kontrollert, og eit resultat som gav ro i rekkjene.

Før avspark var trenar Anders Helsem Hoff klar på at dette handla om haldning og respons – og at han ville sjå ei heilt anna utgåve av laget.

– Det er ein veldig viktig kamp. Vi har hatt to forferdelege kampar, men valte å starte i dag med same spelarane som spelte sist (tap 0–6 for Stordal/Ørskog). Vi vil sjå ei anna innstilling i denne kampen, sa Hoff.

To raske – og Sander fekk hovudrolla

Bergsøy var på frå første spark. Etter berre sju minutt slo Sander Bøe inn eit farleg frispark med venstrefoten. Ballen segla gjennom feltet, forbi både duellar og keeper, og enda i nettet – 1–0 og ein perfekt start.

Og Bøe var ikkje ferdig. To minutt seinare la han inn ein presis corner, og denne gongen var det SIF/Hessa-spiss Jonathan Mulelid som vart siste mann på ballen. Dermed stod det 2–0, og Bergsøy hadde verkeleg fått kampen dit dei ville.

Mulelid var for øvrig den som var nærast å skape spenning for bortelaget. Han pressa fram redningar frå Bergsøy-keeper Pedro Gonzalez etter 19 og 24 minutt, og hadde også ei scoring som vart annullert for offside etter halvtimen. Likevel var det Bergsøy som såg kvassast ut framover. Bendik Frøysa hadde mellom anna eit forsøk som small i tverrleggjaren.

3–0 før pause – og første offisielle for Vike

Mot slutten av omgangen var Aureal Abidoye ein av dei som stod fram med fleire gode aksjonar. Det aller beste kom etter 43 minutt: Eit kraftig rykk forbi ein forsvarar, før han spelte ut til Sander Mäkiperä Vike som kom fri på venstresida. Vike var iskald og sette inn 3–0.

Kontrollerte resten

Etter pause vart kampen jamnare, med færre sjansar. Men Bergsøy hadde kontroll, og sleppte ikkje SIF/Hessa til i dei store situasjonane. Det var Hoff godt nøgd med.

– Ein god reaksjon på dei to siste kampane. Et godt steg i rett retning utan at vi skal friskmelde oss heilt. Det positive i dag er at gutane responderte på ein heilt rett måte.

Dagens Bergsøyspelar

Sander Mäkiperä Vike var ikkje berre yngstemann på bana – han vart også kåra til dagens Bergsøyspelar. Han debuterte for A-laget i fjor som den yngste Bergsøy-spelaren nokon gong, litt over 15 år gammal. No kom også det som vart hans første offisielle mål i Bergsøy-drakta.

– Fantastisk. Eg var redd for å dunke ballen over mål, så eg gjorde det enkelt. Vi hadde god kontroll etter dei tre måla, og då styrte vi resten av kampen. Vi må seie oss godt fornøgde med det!, sa Vike etter kampen.