Effektiviteten til Bergsøy blei avgjerande då dei gjesta Hareid fredag kveld. Kaptein Daniel Jøsok Kvalsvik sørga for at herøyværingane fekk ein draumestart, med to scoringar i løpet av dei første tjue minutta – og det skulle vise seg å halde heilt inn.

Hareid hadde mykje ball på Bergsøy sin banehalvdel i opninga, men det var likevel bortelaget som fekk kampens første mål. Etter ti minutt kom Bergsøy til eit angrep som frå vår posisjon på avstand var vanskeleg å sjå alle detaljane av, men utfallet var klårt: Daniel Jøsok Kvalsvik sette inn 1–0.

Berre ti minutt seinare kom også 2–0. Hareid rota det til i forsvar, og då Kvalsvik fekk sjansen åleine med Adrian Støylen Haraldsvik – fjorårets Bergsøy 2-keeper – var kapteinen sikker og dobla leiinga.

Etter dette heldt Bergsøy fram med å styre mykje av kampen, samstundes som Hareid absolutt viste at dei kunne vere farlege. På eit tidspunkt måtte Pedro Moreno Gonzalez hente fram ei solid redning for å halde på den komfortable leiinga. Mot slutten av første omgang fekk Hareid meir spel på Bergsøy sin banehalvdel igjen, men utan å få utteljing. Dermed stod det 2–0 til pause.

Etter kvilen blei det færre store sjansar å skrive heim om. Bergsøy var likevel nær ei scoring då dei traff stolpen, og Bendik Frøysa hadde dessutan eit skot som var centimeter frå å finne heilt oppe i vinkelen. Totalt sett var 2–0 eit greitt bilete av kampen, sjølv om Bergsøy i stor grad var effektive i det dei fekk sjansane sine tidleg.