Bergsøy Volleyball 1972-1995

Bergsøy Volleyball 1972–1995

Historie

Idag består Bergsøy Idrettslag av Fotball, Friidrett og Handball – men opp igjennom tidene har idrettslaget hatt fleire idretter å halde styr på. Det er i desse dager 50 år sidan Bergsøy Volleyball så smått hadde starta å kome igang med sine første treningar. Volleyballgruppa heldt deretter koken i godt over 20 år; frå starten i oktober 1972 til oppløysinga av volleyballgruppa blei ei sak på årsmøte i 1995.

Etter at brusambanda kom på plass i kommuna førte dette til aukande aktivitet og fleire medlemmar i klubben på tampen av 1960-talet. Klubben hadde hatt fleire år med trang økonomi, og hadde blant anna måtte legge ned handballen i klubben i 1966 ettersom det kun var to medlemmar igjen som betalte kontingent. Eivind Rødal fekk så i sving igjen handballgruppa i 1968, og vidare undersøkte klubben om det var mulig å starte symje- og friidrettsgruppe under leiing av lærarane Arne Reed og Arthur Westbø. Det største problemet var at det var vanskelige treningsforhold med alt for liten kapasitet på gymsalar.

Arthur Westbø og volleyball i 1972

Arthur Westbø blei formann i handballgruppa i 1969, og var dermed godt kjent med klubbens manglande fasilitetar for innandørstrening. Handballen blei for det meste utandørs, og Bergsøy hadde i 1970 meldt på fire lag til seriestart i utandørsserien. Endå meir kamp om treningstidene i gymsalane blei det etter at Westbø sa seg villig til å starte ei volleyballgruppe for herrer og damer i 1972.

Westbø, som var lærar ved Ytre Herøy Ungdomsskule, var nemlig utdanna frå Idrettshøgskulen med volleyball som hovedidrett, der han også var aktiv på skulen sitt lag. I oktober 1972 måtte interesserte melde seg i Bergsøy skule sin gymsal, der det i første omgang var snakk om å etablere herrelag. Volleyballgruppa skulle bli tillagt Bergsøy Idrettslag, men med eit eige økonomisk styre.

31. oktober kunne Vestlandsnytt melde at det var påmeldt både herre- og damelag i serien. Damelaget skulle spele i 2. divisjon medan herrelaget var påmeldt 3. divisjon.

1973

I november 1973 hadde to herrelag frå Herøy meldt seg inn i volleyballserien i 3. divisjon: Bergsøy Volleyballklubb og Ytre Herøy Ungdomsskule. Sjølv om volleyball var ganske nystarta, var Sunnmøre sitt distrikt i landssamanheng eit av dei beste, med KFUM Volda som det beste laget i området i 1. divisjon.

Desse laga møttest også på Bergsøy skule i den første kampen, som Bergsøy VBK vann med 3–1 etter settsiffer 15–2, 15–5, 13–15 og 15–12. Laget var jamnare og betre, men det var ingen god kamp.

1974

I september 1974 starta treningane. Serien starta i månadsskiftet oktober/november. Jentene starta sine treningar også dette året, men det blir ennå ikkje aktuelt å melde på serielag her.

1. november: Bergsøy er med i 3. divisjon for herrer.

I desember 1974 slo Bergsøy Valderøy med 3–1. Sist dei møttest tapte Bergsøy 0–3. Kjell Vike, Alf Terje Bjerkvik og Jan Olav Sandnes spelte godt. Trenar var no Alf Terje Bjerkvik som har fått sving på laget; han spelte tidligare på KFUM Ulsteinvik.

1975

I januar 1975 slo Bergsøy SUSI 15–13, 15–5, 15–4.

I februar 1975 gjer Bergsøy Volleyballklubb stadig framgang og vann 3–1 mot LVK (Lærarenes Volleyballklubb) frå Ålesund. Bergsøy enda då midt på tabellen i 3. divisjon og satsa for fullt mot neste år. Laget var Karl Bjarte Vike, Knut Berge, Johs Nørvåg og trenar Alf Bjerkvik, samt Jan Olav Sandnes, Per Botn og Johan Moltu.

1976

I januar 1976 skal Bergsøy sitt volleyballag spele to kampar i Fagerlihallen, mot SUSI og Lærarenes Volleyballklubb. Bergsøy ligg nest sist på tabellen. BIL vann overraskande 3–1 mot Volda Gymnas og er oppe i åtte poeng med tre heimekampar igjen. Bergsøy har gjort det skarpt med to sigrar på dei tre siste bortekampane. Laget skal møte topplaget Valder i gymnastikksalen på Bergsøy skule.

28. januar skriv Vestlandsnytt at Johan Moltu og Johs Nørvåg gjorde seg best bemerka på laget i kampane mot LVK.

I april 1976 ser tabellen slik ut:

Serien starta på nytt 22. oktober 1976. Bergsøy møtte Valder på Indre Herøy Ungdomsskule og vann 3–1. Det blei seinare eit tap 3–2 for Langevåg.

I november 1976 deltok Bergsøy i norgesmesterskapet i volleyball i Fagerlihallen og var nære på å gå til finalen. Laget tapte knepent 2–1 mot vinnarane Teknisk skule. Bergsøy blei nummer 3 av 8 lag i si pulje.

1978

I november 1978 vann Bergsøy 3–1 mot Ålesund tekniske skule og har då ein siger og eitt tap hittil. Sigeren 3–1 over Ålesund tekniske skule kom med settresultat 15–2, 15–6, 11–15, 15–11. Førstesmasher Per Botn var Bergsøy sin nyttigaste mann, og elles god kamp av Johs Nørvåg.

1979

I oktober 1979 blir det spelt kamp mellom førstelaget og andrelaget til Bergsøy idet Herøyhallen blei teken i bruk. Bergsøy 2 vann 28–14. Etter at BVK rykte ned til 4. divisjon året før, har Bergsøy påmeldt to lag i 4. divisjon.

1980

I februar 1980 var BVK 2 så godt som sikra opprykk frå 4. divisjon til 3. divisjon etter at laget slo KFUM Volda med 3–2 i ein jamn og spennande «finalekamp». Bergsøy snudde kampen til sin favør etter fornuftige taktiske disposisjonar av sin rutinerte lagleiar Johan Moltu.

1982

I romjula 1982 hadde Bergsøy romjulsturnering 29. desember i Herøyhallen. Turneringa varte i sju timar, og det blei spelt kampar på fire baner samtidig. Til slutt var det Volda 1 som stakk av med sigeren, der den dominerande spelaren var 1. divisjonsspelar Svein Berg Rusten.

1983

I 1983 spelar Bergsøy i toppen av 5. divisjon. 4. mars kunne Vestlandsnytt informere om at Bergsøy BVK kunne gratulerast med KM-tittel i 5. divisjon etter at laget slo Herd 3–1.

Oktober 1983: Gutelaget 16 år til Bergsøy Volleyballklubb, med trenar og formann Kjell Berge:

1984

I oktober 1984 spelar herrelaget i 5. divisjon og damelaget i 4. divisjon.

1987

I november 1987 kjem det nytt lag: KFUM/Fosnavåg. Dei siste åra har det nemleg ikkje vore volleyballag i Bergsøy, bortsett frå skulelaget. Veteran frå Bergsøy Volleyballklubb, Gunnar Kvalsund, er med på det nye laget. Trenar og strateg er Karsten Sævik, med erfaring frå 2. divisjon med NTHI i Trondheim.

Laget låg nede lenge før Astrid B. Roseth starta oppatt treningane i 1988. Berre Astrid, Torunn Torgersen og Linn Vasslag er med vidare frå den første tida.

1990–1992

I 1990 er det oppretta ny volleyballgruppe i Bergsøy, står det i avisa 7.12.1990. I 1991 er Astrid Roset leiar i Bergsøy Volleyball.

I 1992 spelar Bergsøy jentene i 5. divisjon. Laget trenar i Herøyhallen to gongar i veka.

Økonomien har vore skral, men laget blei veldig takknemlige då Arthur Westbø sponsa laget med nye drakter.

1993

3. september 1993: Det blir tatt initiativ til nytt herrelag. Det er no 7–8 år sidan sist Bergsøy var representert i herreserien, og ein av initiativtakarane, Børre Berstad, meiner å ha registrert interesse for å bygge opp nytt lag.

I desember 1993: Etter at Bergsøy damelag blei nedlagt for ei tid sidan har det ikkje vore aktivitet i volleyballgruppa. Men ein håpar å stille herrelag til neste sesong.

1995

I 1995 blir volleyballgruppa oppløyst. Saka blir handsama på årsmøtet 30. november.