Sterk seriestart: Bergsøy kontrollerte og vann 4–1 borte

Bergsøy sin seriepremiere i 4. divisjon hamna litt i bakgrunnen i lokalmiljøet, med handballdrama i Herøyhallen same dag. Men ute på bana leverte fotballkarane varene: 4–1 borte mot Aksla og ein start som gav trenar Anders Helsem Hoff svært god grunn til å smile.

– Ja, dette må vi seie oss veldig godt nøgde med. Bortekamp mot Aksla indikerer ein tøff fysisk batalje, og det vart slik vi trudde. Men oppsummert vann vi ikkje med eit mål for lite. Vi kunne ha scora to-tre mål til på tampen, sa Hoff etter kampen.

Bergsøy fekk tidleg kontroll og tok leiinga på eit flott langskot frå unge Sander Bøe. Før pause auka Enrique Crespo Søvik til 2–0 på straffespark. Samstundes måtte fjorårets toppscorar av ved pause, fordi han sleit litt med ein lårskade.

Inn kom Kristoffer Cadua Dalstrøm – og han brukte knapt tid på å takke for sjansen. Like etter sidebyte sette han inn 3–0, og Bergsøy såg ut til å ha full styring.

Utvising, men framleis overtak

Det vart ein kamp med ein del temperatur, og det enda med fleire gule kort. Ein av Bergsøy sine debutantar, irske Shadrach Onwubiko, fekk to gule og måtte dermed tidleg i dusjen.

Hoff forklarar at laget la om etter utvisinga og spelte meir på overgangar.

– Trass i at vi spelte siste halvtimen med ti mot elleve, var det vi som noterte oss for dei fleste sjansane. Vi la om til 4–4–1 og satsa på overgangar, forklarar han.

Aksla fekk riktignok ei redusering til 1–3 på straffespark kort tid etter utvisinga, men Bergsøy svarte. Simon Sieminski gjorde 4–1 i det 65. minutt og punkterte i praksis kampen.

Bergsøy kunne faktisk ha auka ytterlegare mot slutten, då dei kom til fleire flotte overgangar og gode forsøk, men 4–1 vart ståande som sluttresultat.

– Vi reiser heim att med ei god kjensle etter denne kampen. Spelet sat tidvis veldig bra, og eg er nøgd med innsatsen til alle, seier Hoff.

Han gav ekstra ros til Simon Sieminski for hard jobbing som også enda med mål, og løfta òg fram den irske debutanten Ben Rossiter.

Neste kamp for Bergsøy er heime mot Stranda fredag 19. april. Stranda opna sesongen med 3–2-siger over Langevåg.