Bergsøy var i store delar av førsteomgangen eit hakk vassare enn Ørsta. Ørsta opna riktignok friskt dei første femten minutta, men etter kvart vart det tydeleg kven som heldt høgast kvalitet.

Enrique Crespo Søvik fekk først ei scoring annullert for offside, men kort tid etterpå slo målsniken frå Bergen til igjen – og enda opp som tomålsscorar. Sander Bøe smelte til med eit kanonskot som gjekk rett i metallet, men Bergsøy skulle likevel gå til pause med 3–0. I siste minuttet av omgangen sende Nils-Erik Engen eit frispark frå god distanse rett i mål.

Rett etter pause var det Bergsøy-debutant Alexander Lillenes Hestad som trefte tverrleggjaren. Då såg det ut som dei 170 tilskodarane knapt kunne førestille seg at dette skulle bli spennande.

Men då klokka passerte 70 minutt og det framleis stod 3–0, vakna Ørsta brått til liv. Lasse Rebbestad reduserte i det 74. minutt, før innbytar Gatlang Gatluak Tut sette inn 3–2 fem minutt seinare.

Innbytet av Tut vart ein fulltreffar for Ørsta-trenar Toni Sandanger. Den høgreiste angrepsspelaren var med på å gi ørstingane fart og tru, og like etterpå var det også nære utlikning – men denne gongen var det Ørsta som trefte rammeverket.

Nærare kom ikkje gjestane, og dermed måtte tidlegare BIL- (og Sande-) trenar Sandanger gratulere gamleklubben med cupavansement.

Etter kampen trekte Hoff særleg fram debutantane Alexander Hestad og Elias Skogen Hauge – ikkje minst måten Hauge løyste ei for han uvant høgreback-rolle på.