Mykje å bygge på – sjølv med 0–3 i Ålesund

Bergsøy fekk ein tung kveld på bortebane mot Herd fredag, og med 0–3-tapet vart det også vanskelegare å henge med heilt oppe i toppsjiktet i 4. divisjon. Samstundes meiner trenar Anders Helsem Hoff at det faktisk var fleire lyspunkt i prestasjonen, sjølv om resultatet vart brutalt.

Hoff peikar på at årets Bergsøy-lag, med mange unge talent, naturleg nok har svinga ein del gjennom sesongen – frå det verkeleg gode til det meir ujamne. Mot Herd var det marginane som vart avgjerande.

Heimelaget fekk ein draumestart då Andreas Stensøe stanga inn 1–0 på ein corner like etter avspark. Deretter drøya det lenge før neste scoring kom, men etter rundt ein time utnytta Herd ei kontring og auka til 2–0 ved Peder Meyer. Tre minutt før full tid fastsette Erik Halkjelsvik sluttresultatet til 3–0.

Trass i at det vart null utteljing framover, meiner Hoff at Bergsøy hadde mykje av spelet – i alle fall i periodane mellom dei to 16-meterane.

– Eg er faktisk godt nøgd med mykje av spelet vårt i denne kampen. Mellom dei to 16-meterane var det vi som hadde mest og best spel, men sjølvsagt er det måla som avgjer. Og vi er naturleg nok misnøgde med å tape. Men det er mykje positivt å ta med seg, seier Hoff.

Han rosar innsatsen til heile laget, men trekk særleg fram Elias Skogen Hauge, den unge backen Bergsøy henta frå MTG før sesongen.

Hoff meiner også at Bergsøy hadde sjansane til å kome inn i kampen medan det framleis berre stod 0–1.

– Då vi låg under 0–1 hadde vi fleire moglegheiter, mellom anna to kjempesjansar der vi avgjort burde ha sett ballen i nota. Det vart dessverre ein kamp med marginane imot denne gongen, fastslår han.

Etter 10 kampar står Bergsøy med 13 poeng og ligg rundt midten av tabellen. Vårsesongen har vore prega av mange bortekampar, og trenaren ser fram til at laget etter kvart kan ta i bruk det nye kunstgraset på Havila Stadion i Fosnavåg, som er venta klart ein gong utpå i august. Då kan det bli fleire kjekke heimekveldar igjen.

Før den tid står éin kamp att før vårsesongen er over: bortekamp mot Ravn komande torsdag. Hoff ventar ei tøff oppgåve.

– Dei har overraska positivt i år, og det blir ein tøff kamp for oss. For oss vil det vere viktig å få eit resultat i den kampen, seier trenaren.