Sensasjonell snuoperasjon på Havila: frå 0–3 til 4–3

Det vart ein kveld publikum på Havila Stadion Fosnavåg seint gløymer. Bergsøy låg under 0–3 mot opprykksjagande Rollon, men snudde alt og vann 4–3 i eit oppgjer fullt av dramatikk frå start til slutt.

Rollon fekk ein brutal start for Bergsøy sin del og leia 3–0 alt etter 25 minutt. På det tidspunktet var det fleire som byrja å lure på kor stygt dette kunne bli.

Men Bergsøy nekta å gi seg. Dei fekk liv i kampen att før pause, då Daniel Jøsok Kvalsvik og Sander Mäkiperä Vike reduserte, slik at det stod 2–3 ved sidebyte.

I pausen kom unge Alexander Lillenes Hestad inn for «Jøsse» Kvalsvik – og innbytet skulle vise seg å bli reint avgjerande. Tjørvågaren sette inn to mål i andre omgang, og då han scora vinnarmålet i det 86. minutt, var snuoperasjonen komplett: 4–3 og full jubel.

Trenar Anders Helsem Hoff var både letta og stolt etter kampslutt, og meinte sigeren fortel mykje om laget.

– Sigeren viser karakter. Det nye dekket på bana har gitt oss eit lyft i trening og kamp, vil eg påstå, sa Hoff.

Han forklarar at kampen eigentleg starta jamt, men at Bergsøy fekk tre stygge glippar som Rollon straffa nådelaust.

– Først eit straffespark, så på ei kontring og så som følge av manglande avklaringar i bakre rekkjer. Då såg eg mørkt på det, vedgår Hoff.

Likevel kom reaksjonen han håpa på. 1–3 gav tru, 2–3 gav endå meir, og i andre omgang fullførte Bergsøy snuoperasjonen.

Om matchvinnaren Hestad var Hoff ekstra fornøgd:

– Alexander var tilbake etter skade, og det var flott for han å få slik suksess etter ein litt trøblete sesong. Heilt perfekt!

Med sigeren ligg Bergsøy no på 5. plass i 4. divisjon, like bak Hareid, som samstundes tapte 0–2 heime mot Ørsta fredag kveld.

Resultatet gjorde også opprykkskampen endå meir spennande. Stordal/Ørskog slo serieleiar Herd (46 poeng) borte og klatra til 2. plass med 44 poeng. Rollon, som låg på andreplass før kampen i Fosnavåg, fall ned til 3. plass med 43 poeng.

Neste kamp for Bergsøy går på heimebane igjen, når Ravn kjem på besøk komande fredag.