Tung kveld for Bergsøy: – Svakaste kampen vår i år

Bergsøy fekk det tøft då dei gjesta Høddvoll fredag kveld. Mot Hødd 2 vart det til slutt eit tungt 5–1-tap, og heimelaget sat eigentleg i førarsetet frå start.

Allereie etter 20 minutt kom 1–0 ved Vegard Håheim-Elveseter. Like før pause dobla innbytar Haakon Brandal Sværen til 2–0, og dermed gjekk Bergsøy til garderoben med to mål i sekken.

– Dei første 10–15 minutta er det mykje Hawaii-fotball. Vi gir bort to billige mål i fyrste omgang. Etter 1–0 spelar vi eigentleg greitt og har mykje ball, men så går vi likevel til pause med 2–0 imot, seier Bergsøy-trenar Anders Helsem Hoff.

Etter pause heldt Hødd 2 fram med å straffe Bergsøy. Sværen sette inn sitt andre for dagen i det 67. minutt, før Andreas Hofseth Televik la på til 4–0 berre to minutt seinare. I det 75. minutt auka Hans-Peter Tjervaag til 5–0.

Bergsøy klarte aldri å verkeleg feste grepet om kampen, men fekk eit lite plaster på såret heilt på tampen då Franjo Tepuric reduserte til 5–1 i det 90. minutt.

Hoff meiner kampbiletet var mykje det same etter kvila.

– Vi har mykje ball og prøver, men dei straffar oss på kontringar. Vi er rett og slett ikkje gode nok i dag. Det blir mykje «nesten». Hødd 2 var betre og vi heng ikkje saman som lag. Vi reagerer for seint, kjem for seint i presset, og då blir det tungt. Dette var ein kollektiv svikt, seier Hoff.

Ser fram til ny kunstgrasbane

Trenaren peikar også på at treningskvardagen kan ha noko å seie.

– Vi har fått trent lite på Havila Stadion i år fordi vi ventar på nytt kunstgras. Det gjer at vi slit litt med avstandane og relasjonane på stor bane. Det skal bli godt å få bytta det dekket i sommar, seier han.

Helsem Hoff legg ikkje skjul på at han er skuffa.

– Dette er den svakaste kampen vår i år, men vi veit vi er betre enn dette. No må vi riste av oss dette og sjå framover. Det er ikkje denne kampen som skal definere sesongen, avsluttar han.

Neste kamp for Bergsøy i 4. divisjon er heime mot Hareid 15. mai.