Pangkveld på Stranda: Bergsøy vann 5–1 – og dei nye tok ansvar

Bergsøy fekk ei skikkeleg storsiger då dei gjesta Stranda fredag kveld i 4. divisjon. Bortelaget var effektive utover i kampen, og etter ei jamn første halvdel, rann det på i andre omgang. Då dommaren blåste av stod det 5–1 til Bergsøy.

Allereie etter ni minutt kom den første scoringa, då Magnus Myklebust sette inn 1–0 for gjestane. Stranda klarte å svare, og ved pause var det 1–1 og alt ope.

Crespo og Myklebust avgjorde etter pause

Etter kvila skrudde Bergsøy opp tempoet, og Enrique Crespo Søvik sendte laget i føringa att med ei straffescoring ti minutt ut i andre omgang. Same Crespo var på plass igjen i det 69. minuttet og auka leiinga ytterlegare.

Så tok Myklebust sin andre for kvelden og gjorde det til 4–1, før Peter Fjørtoft Sandanger satte punktum med 5–1 heilt på tampen.

Hoff: – Det beste vi har levert mot dei

Trenar Anders Helsem Hoff var svært nøgd med både resultat og gjennomføring.

– Kampen gjekk veldig bra, å vinne 5–1 på bortebane mot Stranda er nok det beste vi har vunne mot dei gjennom historia, seier Hoff.

Han peikar på at dette var ein sterk prestasjon for eit lag som framleis er i ein oppbyggingsfase, med mange nye og unge i troppen.

– Vi hadde tre debutantar i denne kampen. Vi er godt fornøgde med at fleire av dei nye spelarane viser seg tilliten verdig og at dei leverte ein god kamp.

Samtidig understrekar han kor viktig det er å ha dei rutinerte med i laget når mykje nytt skal på plass.

– Det er viktig å ha dei med, så dei kan drage dei nye framover. Utover hausten vil det verte mykje ungt og lokalt spel, så får vi sjå om vi kan klare å fortsette slik som fredag, avsluttar Hoff.