Kollaps etter pause: Herd drog frå og vann 8–0

Bergsøy fekk ein beintøff fredagskveld heime på Havila Stadion Fosnavåg. Etter ein disiplinert første omgang og berre 0–1 til pause, sprakk det skikkeleg utover i andre omgang – og til slutt stod det 0–8 på resultattavla. Heile sju av måla kom etter at kampen passerte timen.

Herd har vore ei vrien nøtt for Bergsøy i mange tiår, og kom til Fosnavåg med ekstra tru på seg sjølve etter ein sterk haust utan tap. Før avspark var BIL-trenar Anders Helsem Hoff klar på at bortelaget var favoritt, men håpet var å få med seg poeng for å sikre 5. plassen.

Heldt stand lenge – trass trøbbel før og undervegs

Bergsøy gjekk inn i kampen med fråvær på viktige spelarar, og det blei ikkje enklare då Sander Bøe måtte gi seg alt i oppvarminga. Etter 15 minutt kom også ein ny nedtur då Magnus Myklebust måtte av bana.

Likevel stod heimelaget oppreist og jobba hardt mot eit Herd-lag som hadde mest ball. Ein på tribunen oppsummerte innsatsen ganske presist:

– Dei kjempa som nokre løver!

Det einaste som skilte laga før pause var eit straffespark etter hands. Herd fekk sjansen etter 24 minutt, og Erlend Fjelstad sette inn 0–1. Derifrå og ut spelte Bergsøy disiplinert og hindra fleire baklengsmål, slik at dei framleis hang med halvvegs.

Sju mål siste halvtimen – og hattrick på tampen

Etter pause skrudde Herd opp tempoet, og utover omgangen rann det inn. Bergsøy sitt unge lag fekk ein tung slutt på kampen då Herd scora heile sju mål den siste halvtimen.

På tampen toppa det seg då Henrik Wenstrøm leverte eit ekte hattrick i løpet av dei siste ti minutta.

Bergsøy hadde lite å svare med framover. Jakob Kessler Myking stod for det næraste heimelaget kom med eit skotforsøk, men det blei ikkje meir enn ei halvsjanse.

Herd-trenar Alexander Von Løvensprung var fornøgd etter kampen, og roste samstundes Bergsøy:

– Vi er godt fornøgde med måten vi opptrer på. Det handlar om tolmod. Når vi er oppe i tre mål så handlar det etter kvart berre om kor mange mål det blir. Men all ære til alle dei unge gutane til Bergsøy.

Sesongen har vore prega av mykje rullering

Bergsøy har brukt heile 40 spelarar denne sesongen, noko som seier sitt om både spelarfrafall og at mange unge har fått tidleg ansvar. Laget har elles knapt spelt uavgjort i år – den einaste delinga av poeng kom faktisk borte mot nettopp Herd (1–1).

No står berre ein kamp att, borte mot Ørsta, før ein kan rette blikket mot neste sesong.

Muren: – Gløyme kampen og sjå framover

Veteran Fredrik Muren valde å sjå framover etter storsmellen:

– Resultatmessig blir det styggare enn det bør bli. Men no handlar det for vår del om å starte litt på nytt og å gi dei unge tid til å utvikle seg. Det er det viktigaste. Elles er det berre å gløyme denne kampen her.